XÜSUSİ RAMAZAN BÖLMƏSİ

TƏRAVİH NAMAZI

Şaban ayının sonuncu gecəsində, yəni Ramazanın ilk gününə keçən gecə qılınmağa başlanır və Ramazan ayı boyunca hər gecə Yatsı namazı ilə Vitr namazı arasında qılınır. 20 rükətdir. Bəzən 8 rükət də qılınır. Camaatla da, təkbaşına da qılına bilər. Məsciddə və camaatla qılınması çox fəzilətlidir. Camaatla qılınarkən səslə qılınır. Təravih namazını iki, dörd, səkkiz rükətdən bir salam verməklə qılmaq olar. Birdəfəyə də qılmaq mümkündür. Amma ən çox məsləhət görülən odur ki, iki və ya dörd rükətdən bir salam verilsin.
İki rükətdən bir salam verdikdə sübh namazının sünnəti, dörd rükətdən bir salam verdikdə isə ikindi namazının sünnəti kimi qılınır. Namaza bir dəfə, yəni lap əvvəldə niyyət etmək yetərlidir. Belə niyyət edilir: Niyyət etdim Allah rizası üçün təravih namazı qılmağa. Bu namazı kişilər də, qadınlar da qıla bilərlər. Bir məsələyə xüsusilə diqqət yetirmək lazımdır. Belə ki, başqa aylarda Vitr namazı ayrılıqda və səssiz qılınarsa, Ramazanda imamla birlikdə və səslə qılınır. Ramazan bayramından əvvəlki gecə təravih qılınmaz. İbadətiniz qəbul olsun, sevimli möminlər.

Qaynaq:

- zaman.com.az