QÖNÇƏ

HƏQİQİ QAZANC

Dünyada varlıq sahibi, hər şeyə gücü yetən böyük bir Zat günlərin birində iki xidmətçisini yanına çağırıb onlara bir iş tapşırır. Hərəsinə 24 qızıl verib belə deyir:

Uzun bir səyahətə çıxacaqsınız. Başqa diyardakı kəndimə gedib orada yaşamağınızı istəyirəm.   Mən sizi təkrar hüzuruma çağıracağam. O zamana qədər orada qalmağınızı istəyirəm. Kəndim   sizə əmanətdir. Verdiyim 24 qızıldan həm yol pulunuzu, həm bilet pulunuzu, həm də ki,    kənddəki yaşayış ehtiyaclarınızı ödəyərsiniz. Səyahəti maşın, təyyarə yaxud qatar ilə edə bilərsiniz. Seçim sizindir. O iki xidmətkar böyük Zatın dediklərini diqqətlə dinləyib 24 qızılla   yola düşdülər. Dünyada heç bir varlığa sahib olmadıqları halda böyük bir ərazinin əmanətçisi oldular. Bu zənginliyin əvəzində onlardan birinin ağlı çaşdı, gözü çevrildi, qızıllarını qumarda bir-bir itirdi. Dostu onun bu halına çox üzüldü. Və ona nəsihət verdi:

Bax, dostum, indi mən 24 qızıldan biri ilə bilet alıb təyyarəyə minib 1 saata kəndə gedəcəyəm. Bəs sən? 23 qızılı zərərli bir oyunda əyləncə və nəfsin xatirinə puç etdin. Ağlını başına yığ. O 1 qızılla bir bilet də sən al və qurtul. Əks halda tamamilə zərər içində olacaqsan. Sahibimiz də verdiyi vəzifəni yerinə yetirmədiyin üçün səni cəzalandıracaqdır. Əgər səhv etdiyini və bunu anladığını bildirib ondan bağışlanmağı diləsən O səni bağışlayacaqdır. Çünki O rəhməti böyük olandır. Əlindəki bir qızılla bilet al. Əks halda həlak olub gedəcəksən.

Bəli, hekayəcik burada bitir. İndi soruşacaqsınız ki, o axmaq adam dostunun sözünə qulaq asıb bilet aldımı?

Ümid edirəm ki, o düşüncəsiz adam, dostunun məsləhətini dinləmişdir. Çünki, bu kiçik hekayədə   bizə bildirilən O böyük zat, Rəbbimizdir. O, 24 qızıl 24 saatımızdır. O dayanacaq məzara açılan qapıdır. O bilet ruhlar aləminə etdiyimiz yolculuq üçündür. O bir qızıl isə 5 vaxt namaz üçün ayırdığımız 24 saatdan biri kimidir. Bizə qəbir qaranlığında işıq, axirət yolçuluğunda minikdir. O iki xidmətçi isə Rəbbini tanıyan, namazını qılan bir adamla Rəbbinin nemətlərini inkar edən namazsız bir adamı təqdim etməkdədir. O kənd isə Cənnətdir. Beləliklə, bu hekayə bizə anladır ki, namazını düzgün qılan və bir gündə 24 saatın heç olmazsa bir saatını Rəbbinə şükür və ibadət içində keçirən insan, çox böyük asanlıqlar və rahatlıqlarla qarşılaşacaq. Namazını qılmayan və Rəbbinin nemətlərini inkar edib şükürsüzlüyə düşənlərin aqibəti bərbad olacaqdır. Onlar nəinki itkiyə məruz qalacaq, üstəlik böyük bir cəzaya düçar olacaqlar.